USHAWISHI UTUMIKE KUVUTIA WATU CHF, SI KUWALAZIMISHA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

KATIBU Tawala wa Mkoa wa Singida, Festo Kang’ombe ametaka kuwepo na nguvu ya ushawishi katika kupata wanachama wa Mfuko wa Afya ya Jamii (CHF) na si kuwalazimisha wananchi na kusababisha wakimbilie porini kwa sababu za michango.

Alisema hivyo wakati akifungua mkutano wa siku ya wadau katika wilayani hapa, ikiwa ni sehemu ya upitishaji wa mchakato wa kutungwa kwa sheria ndogo na kutengenezwa hati kwa lengo la kuwezeshwa kuendeshwa kwa mpango wa CHF wilayani humo.

Mchakato huo unaokwenda hatua kwa hatua, unatarajiwa kukamilishwa wakati wa kikao cha Baraza la Madiwani.

Alisema, pamoja na uzuri wa mpango huo ambao ni wa hiari, wananchi wanatakiwa kushawishiwa na si kulazimishwa kwa kutumia mabavu, ili wajiunga na CHF.

Kang’ombe alisema, wilaya ya Mkalama si ngeni katika utekelezaji wa mpango wa CHF na kwamba muitikio mkubwa utakaowezesha kuimarisha huduma za afya wilayani hapo utatokana na nguvu za hoja na wala si hoja za nguvu.

Alisema, wilaya hiyo mpya ilikuwa awali ikitekeleza mpango huo chini ya wilaya ya Iramba na ilionesha mafanikio makubwa tangu kuanzishwa kwake mwaka 2004 ndio maana wilaya nyingi zilifika kujifunza.

Kang’ombe alisema, alipokuwa Ofisa Mipango katika wilaya ya Kahama walifika kujifunza uendeshaji wa CHF, safari ambayo pia iliwafikisha Igunga na Mbinga.

Alisema, taifa lenye wagonjwa haliwezi kusonga mbele na uwekaji wa nguvu za pamoja utawezesha matatizo ya sekta ya afya yaliyopo kwa sasa kuondoka.

 CHANZO ; HABARI LEO.

KUPATA DAWA MKALAMA IMEKUWA VIGUMU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

KAIMU Mganga Mkuu wa Wilaya ya Mkalama mkoani hapa, Ephraim Kaphilimbi amesema agizo jipya la serikali la kutonunua dawa nje ya Bohari Kuu ya Dawa (MSD) limeongeza ugumu wa upatikanaji wa dawa katika wilaya yake.

Aidha, alisema muda MSD inaochukua kujibu maombi yao ni tatizo kubwa katika kuhakikisha kwamba hospitali zote za serikali wilayani humo zina dawa za kutosha.

Alikuwa akijibu hoja za wananchi na wadau wa afya waliokuwa wakisema kwamba ukosefu wa dawa, na kuzuiwa kupata matibabu katika hospitali mbili za misheni wilayani ni kikwazo kwao katika kujiunga na Mfuko wa Afya ya Jamii.

Miongoni mwa waliolalamikia tatizo hilo ni madiwani Mohamed Juma, Ramadhani Mohamed na kiongozi wa dini maarufu kwa jina Shehe Jumanne.

“Ukosefu wa dawa ni tatizo kubwa na suala hili ni kubwa kwa kuwa limeanzia mbali ni suala la kitaifa,” alisema Kaimu Mganga Mkuu huyo na kuongeza kwamba sehemu kubwa ya mkanganyiko wa sasa wa dawa ni kutokana na maagizo hayo kwamba dawa zote zinunuliwe MSD.

Alisema, serikali inasema imeingiza fedha MSD moja kwa moja, lakini dawa hazifiki wilayani na majibu ya maswali kwanini hazijaja huwa yanakatisha tamaa.

Kwa maelezo yake, kutokana na mazingira hayo kwa sasa, Halmashauri haziruhusiwi kununua dawa nje ya maagizo ya serikali.

Alisema, pamoja na dawa kuwa tatizo wilaya hiyo inakabiliwa na ukosefu wa hospitali ya wilaya na zile zinazodhaminiwa zimesimamisha huduma za CHF kutokana na kuidai Halmashauri ya Mkalama fedha nyingi.

Hata hivyo, ilifafanuliwa katika kikao hicho kwamba ukosefu wa dawa ni tatizo kwa kuwa halmashauri husika zinaweza kukopa dawa NHIF wakati wanafanya kukamilisha mipango ya kusubiri dawa za MSD.

CHANZO ; HABARI LEO.

Serikali yaagiza Halmashauri za wilaya manispaa na majiji kutenga maeneo ya vijana kufanyia shughuli za kiuchumi

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Waziri wa Nchi ofisi ya Waziri Mkuu Sera, Bunge, Kazi, Vijana, Ajira na Walemavu, Jenista Mhagama,akizungumza na kamati ya maafa mkoa wa Singida na za wilaya zake zote sita kwenye ukumbi wa mikutano wa ofisi ya mkuu wa mkoa mjini hapa. Waziri Mhagama ameziagiza kamati zote za maafa kuanzia ngazi ya kijiji kujenga utamaduni wa kufanya tafiti zitakazosaidia kupambana na maafa katika maeneo yao.
Na Nathaniel Limu-Mo Blog
[Singida] Waziri wa  Nchi ofisi ya Waziri Mkuu Sera, Bunge, Kazi, Vijana, Ajira na Walemavu, Jenista Mhagama, amezikumbusha halmashauri za wilaya,manispaa na majiji kutenga maeneo maalum kwa ajili ya vijana kufanyia shughuli zao za kiuchumi.
Mhagama ametoa wito huo wakati akizungumza na kamati ya maafa ya mkoa na zile za wilaya sita kwenye mkutano uliofanyika kwenye ukumbi wa mikutano wa ofisi ya mkuu wa mkoa mjini hapa.
Alisema kundi la vijana ambalo ndilo kubwa zaidi,linategemewa na familia,wilaya,mkoa na taifa kwa ujumla katika jukumu la upatikanaji wa maendeleo yakiwemo ya kiuchumi,hivyo linapaswa kujengewa mazingira mazuri na rafiki, kwa ajili ya shughuli zao.
Aidha, alisema halmashauri pamoja na kuwajibika kuwatengea  vijana maeneo maalum ya kufanyia shughuli zao,pia zinapaswa zitenge fedha za kutosha kwa ajili ya kuwakopesha viana na wanawake waweze kuboresha mitaji yao.
Katika hatua nyingine, waziri huyo ameagiza ukaguzi ufanyike viwandani na sehemu za kibiashara kubaini iwapo vijana/watu walioajiriwa,wana mikataba ya kazi na wanalipwa kiwango kilichowekwa na serikali.
“Hili jukumu nalitoa kwa wakuu wa mikoa, hakikisheni kila mwajiriwa kwenye sekta binafsi, wanakuwa na mikataba ya ajira na wanalipwa kwa mujibu wa maelekezo ya serijkali. Serikali haiwezi kuvumilia vijana au watu wengine wanaendelea kunyonywa nguvu zao na waajiri wasiofuata maagiza ya serikali”,alisisitiza Mhagama.
Katika hatua nyingine,waziri huyo alisema katika juhudi za serikali za kuhakikisha hakuna Mtanzania atakaye kufa kwa njaa, imeongeza tani zingine zaidi ya elfu tatu za nafaka kwa mkoa wa Singida, ili kupunguza makali ya njaa.
“Huu msada wa chakula kwa watu wenye upungufu wa chakula,utatumwa mkoani kwenu wakati wo wote kuanzia sasa,Natoa onyo,chakula hiki kiwafikie walengwa tu,ikibainika msimamizi amekwenda kinyume,huyo atakuwa hajipendi”,alisema.
Awali Katibu Tawala msaidizi, uchumi na uzalishaji sekretarieti ya mkoa wa Singida,Aziza Mumba,alisema mkoa una upungufu wa chakula tani 104,672.
Alisema kati ya tani hizo,tani 100,897 ni za kuuza kwa ajili ya kupunguza makali ya bei,na tani 4,275 ni kwa ajili ya wananchi wasiojiweza.
Aidha,Mumba alisema katika awamu ya mwezi huu,serikali kuu imetoa tani 328.7 za chakula bure kwa watu wasiojiweza na tani zingine 2,958.3 kwa ajili ya kupunguza makali ya bei ya chakula.
Kwa upande wake mbunge wa jimbo la Singida magharibi (CCM) Elibariki Kingu, pamoja na kuipongeza serikali kuu kwa kuwajali wananchi wake ili wasife njaa,ameiomba awamu hii ya tani zaidi ya elfu tatu, itumwe mapema iwezekanavyo iweze kunusuru baadhi ya kaya ambazo hazina kabisa chakula.

Mbunge wa jimbo la Singida magharibi (CCM), Elibariki Kingu, akisisitiza jambo kwenye mkutano ulioitishwa kwa ajili ya Waziri wa Nchi ofisi ya Waziri Mkuu Sera, Bunge, Kazi, Vijana, Ajira na Walemavu, Jenista Mhagama, kuzungumza na kamati za maafa ya mkoa na za wilaya zote sita.

Baadhi ya wajumbe wa kamati ya mkoa na za wilaya sita za mkoa wa Singida,wakimsikiliza Waziri wa Nchi Ofisi ya Waziri Mkuu Sera, Bunge, Kazi, Vijana, Ajira na Walemavu, Jenista Mhagama (hayupo kwenye picha).(Picha zote na Nathaniel Limu).

 

RC Singida azindua bodi ya nne ya maji bonde la kati huku akitaka kuepusha migogoro ya maji

Mkuu wa mkoa wa Singida,Dk.Parseko Kone, akifungua hafla ya uzinduzi wa bodi ya maji bonde la kati. Hafla hiyo ilifanyika kwenye ukumbi wa mikutano wa Aqua Resort Vitae mjini hapa. Kulia ni Mwenyekiti  mpya wa bodi ya maji bonde la kati, Eng.Samson Babala na kushoto ni Naibu Katibu TAMISEMI, Eng.Emmanuel Kalobelo.

Naibu Katibu Mkuu TAMISEMI, Eng.Emmanuel Kalobelo, akitoa nasaha zake kwenye hafla ya uzinduzi wa bodi mpya ya maji bonde la kati uliyofanyika kwenye ukumbi wa mikutano wa Aqua Resort Vitae mjini hapa. Wa kwanza kulia ni Mwenyekiti mpya wa bodi ya maji bonde la kati, Eng.Samson Babala, wa pili kulia ni Mkuu wa mkoa wa Singida, Dk.Parseko Kone na kushoto ni Mwenyekiti mstaafu bodi ya maji bonde la kati, Eng.Mwanaasha Ally.

Mwenyekiti mstaafu wa bodi ya maji bonde la kati, Eng.Mwanaasha Ally, akitoa nasaha zake kwenye hafla ya uzinduzi wa bodi mpya ya maji bonde la kati iliyofanyika mjini hapa jana.Kushoto walioketi  ni Naibu Katibu Mkuu TAMISEMI, Eng.Emmanuel Kalobelo, katikati ni Mkuu wa mkoa wa Singida, Dk.Parseko Kone na wa kwanza kulia ni Mwenyekiti mpya bodi ya maji bonde la kati, Eng.Samson Babala.

Baadhi ya wajumbe wa bodi ya maji bonde la kati waliohudhuria hafla ya uzinduzi bodi hiyo iliyofanyika kwenye ukumbi wa mikutano wa Aqua resort vitae mjini hapa.(Picha na .Nathaniel Limu).

Na Nathaniel Limu, Singida

MKUU wa mkoa wa Singida, ameuhimiza uongozi mya wa bodi ya maji bonde la kati kufanya maandalizi ya kina yatakayowezesha kupata mbinu na njia za kisasa za kusimamia na kugawa maji,ili kuepusha migogoro ya maji.

Dk.Kone ametoa rai hiyo wakati akizindua bodi ya nne ya maji bonde la kati.Uzinduzi huo ulifanyika katika ukumbi wa mikutano wa Aqua Vitae Hoteli mjini hapa.

Alisema Tanzania inalenga kwenda kwenye uchumi wa kati ifikapo mwaka 2025,mojawapo ya vichocheo vikubwa katika kufikia malengo hayo,ni mapinduzi ya kilimo na viwanda ambavyo yatahitaji maji mengi  na ya kutosha.

Dk.Kone alisema pamoja na kilimo na viwanda kuhitaji maji ya kutosha,pia ongezeko la watu na shughuli zao mbalimbali zikiwemo za kiuchumi,zinazitaji kiwango kikubwa cha maji.

“Kutokana na uhitaji huo mkubwa wa maji,uwezekano wa kutokea kwa migogoro itakayotokana na uhitaji wa maji,ni mkubwa.Nina taarifa kuwa tayari migogoro hii imeanza kuongezeka hasa katika maeneo ya mikoa ya Manyara na Arusha.Bodi hii ni lazima isimamie kikamilifu masuala haya kwa ukamilifu na ufanisi mkubwa”,alisema.

Katika hatua nyingine,mkuu huyo wa mkoa alisema maamuzi mengi duniani ambayo ni pamoja na yanayohusu maji,yanafanywa na wanasiasa au na viongozi ambao ni wanasiasa.

“Kwa hiyo katika utendaji kazi wenu,hamna budi kushirikiana na wanasiasa na viongozi wengine wa serikali katika ngazi za kitaifa,mikoa,wilaya,kata na vijiji,ili kutatua changamoto za maji kwa pamoja”,alisema.

Aidha,Dk.Kone ametoa rai kwa Katibu Mkuu Wizara ya Maji na Umwagiliaji, katika bajeti ya maji watoe kipaumbele katika utunzaji na usimamizi wa rasilimali za maji, ukusanyaji na uchambuzi wa takwimu za maji kwa wingi.

“Bila takwimu za muda mrefu na sahihi,usimamizi wa rasilimali za maji utakuwa ni mgumu sana na unakuwa sio wa kisayansi”,alifafanua Dk.Kone.

Awali Naibu Katibu Mkuu Wizara ya Maji na Umwagiliaji, Eng.Emmanuel Kalobelo, alisema majukumu ya msingi ya bodi ya maji za mabonde,ni kusimamia,kupanga na kuendeleza rasilimali za maji zilizoko katika mabonde.

“Bodi hizi zikifanya kazi zake vizuri,Watanzania tutakuwa na uhakika wa uatikanaji endelevu wa maji,kwani bodi hizi ni lazima zitayarishe miango ya usimamizi wa rasilimali za maji katika mabonde.

Akifafannua zaidi, Eng.Kalobela,alisema bodi za maji za mabonde zinaaswa kushirikiana na wadau wengine kutatua migogoro ya utunzaji wa maji inayojitokeza katika maeneo yao.

Kwa mujibu wa Naibu Katibu Mkuu huyo, Tanzania ina mabonde tisa, ambayo ni bonde la Pangani, Ruvuma, waMi ya kusini, Rufiji, Wawi/Ruvu, Ziwa Victoria, Ziwa Nyasa, Ziwa Rukwa, Ziwa Tanganyika na bonde la kati.

Na Mo Blog 

Wanachama wa CCM Singida, wajitokeza kuvaa viatu alivyoviacha Mgana Msindai vya nafasi ya uenyekiti CCM mkoa

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Mwana CCM, Martha Mosses Mlata (kushoto) akirejesha fomu za kugombea nafasi ya Mwenyekiti wa CCM mkoa wa Singida kwa Katibu msaidizi CCM mkoa wa Singida, Adamu Makulilo leo.Nafasi ya Mwenyekiti wa CCM mkoa wa Singida,iliachwa wazi na Mgana Izumbe Msindai aliyetimkia CHADEMA baada ya kushindwa kwenye kura za maoni wakati wa kinyang’anyiro za kura za maoni (nafasi ya ubunge) ndani ya CCM.

Mwanyekiti wa jumuiya ya wazazi (CCM) mkoa wa Singida, Yusuph Mwandami Gwayoka (kushoto) akikabidhiwa fomu ya kugombea nafasi ya mwenyekiti wa CCM mkoa wa Singida na Katibu msaidizi CCM mkoa wa Singida, Adamu Makulilo.Picha na Nathaniel Limu.

Na Nathaniel Limu, Singida

MBUNGE wa viti maalum (CCM)  mkoa wa  Singida, Martha Mosses Mlata ni miongoni mwa wana CCM sita ambao wamejitokeza kuomba kuziba nafasi iliyoachwa wazi na Mgana Izumbe Msindai ya mwenyekiti wa CCM mkoa aliyetimkia CHADEMA muda mfupi baada ya kushindwa kwenye uchaguzi wa kura za maoni (CCM) kugombea ubunge.

Wana CCM wengine waliochukua fomu hadi leo jioni toka zoezi la uchukuaji fomu lianze Januari sita mwaka huu asubuhi,ni Juma Hassan Kilimba, Mohammed Hamisi Missanga, Narumba Barnaba Hanje, Shafii Juma Mtaturu na Yusuh Mwandami Gwayoka.

Katibu msaidizi wa CCM mkoa wa Singida,Adamu Makulilo,alisema hadi sasa aliyekuwa mbunge wa jimbo la Iramba Juma Hassan Kilimba,Martha Mlata na aliyemaliza muda wake wa ubunge wa jimbo la Singida magharibi mwaka jana,Mohammed Hamisi Missanga,wameisha rejesha fomu zao.

Adamu alisema zoezi hilo la utoaji wa fomu bado linaendelea na linatarajiwa kukoma januari 10 mwaka huu saa kumi jioni.

“Nitumie fursa hii kuwaomba wana CCM  wajitokeze kwa wingi na hasa wale watakaojipima na kubaini wanao uwezo wa kuvaa viatu vilivyoachwa na Mgana Msindai,ili kuleta upinzani wa kweli utakaosaidia CCM kupata mwenyekiti atakayemudu kasi iliyopo hivi sasa nchini.Ada ya fomu ni kama bure kabisa, kwa sababu tunatoza fomu ‘buku’ tu (shilingi 10,000)”,alisema katibu msaidizi huyo.

Akizungumza na mwandishi wa habari hii kwenye viwanja vya CCM mkoa,Mlata alisema kuwa safari hii ni zamu ya mwanamke kuongoza chama tawala mkoani hapa,na kwamba mwanamke huyo si mwingine isipokuwa ni yeye (Mlata).

Alisema amejikagua na kujitathimini na kubaini kwamba anao uzoefu wa kutosha kuwatumikia wana CCM na wananchi kwa ujumla katika nafasi hiyo ya mwenyekiti CCM mkoa.

“Kupitia nafasi mbalimbali nilizozipata ikiwemo ya ubunge wa viti maalum,nafahamu vyema Chama Cha Mainduzi kinavyoongozwa,nazijua changamoto ya chama chetu kuanzia ngazi ya chini ya tawi hadi mkoa.Kwa ukweli huo,mimi ni chaguo sahihi kupewa nafasi iliyoachwa wazi na kaka yangu Msindai”,alisema.

Mlata aliyesema endapo atafanikiwa kuchaguliwa kuwa mwenyekiti wa CCM mkoa wa Singida,atatumia nguvu zake zote amoja na wanachama wengine,kurejesha umoja na mshikamano miongoni mwa wana CCM,ili mkoa uendelee kuwa wa CCM chama cheye sera zinazotekelezeka.

“Nitashirikiana na wana CCM wenzangu kukiimarisha chama na kuhakikisha CCM inawajengea mazingira mazuri wananchama wake ili waweze kuboresha hali zao za kiuchumi.Tatizo linalosababisha mwanachama ye yote wa chama cho chote cha saisa kuhama hama,ni umaskini tu.Lakini mtu kama ana uwezo mzuri kiuchumi,huyo sio rahisi kumurubuni au kumdanganya”,alisema Mlata.

Kwa upande wake Yusuph Mwandami Gwayoka, alisema kuitia nafasi yake ya mwenyekiti wa jumuiya ya wazazi mkoa,anayo uzoefu wa kutosha wa kumudu nafasi ya mwenyekiti CCM mkoa.

“Mimi nimejipanga vema kushindana na wana CCM wenzangu katika kuwania nafasi hii ya mwenyekiti wa CCM mkoa wa Singida. Niwaase tu wagombea wenzangu kwamba tunakwenda kushindana na wala hatuendi kugombana.Kwa hali hiyo,kabla na baada ya matokeo kutangazwa,tuendelee kudumisha umoja na mshikamano na ikiwezekana,ushirikiano tulio nao,tuuboreshe zaidi”,alifafanua Mwandami.

MO BLOG

Jeshi la Polisi mkoani Singida lamshikilia mtu anayedhaniwa kuwa jambazi sugu sedoyeka

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Kamanda wa jeshi la polisi mkoa wa Singida, ACP.Thobias Sedoyeka.

Na Nathaniel Limu, Singida-Mo Blog

Jeshi la polisi mkoani Singida,limefanikiwa kukamata mkulima na mkazi wa Kibaoni Iddy Issah (33), anayedhaniwa kuwa ni  jambazi sugu baada ya kulipiga risasi moja mguu wake wa kulia, wakati alipojaribu kutoroka.

Kaimu kamanda wa polisi mkoa wa Singida, ACP Simon Haule,alisema mtuhumiwa huyo amekamatwa Januari tatu mwaka huu saa 7.20 usiku katika baa ya Leaders iliyopo kata ya Kindai tarafa ya Unyakumi manispaa ya Singida.

Alisema siku ya tukio askari polisi walipokuwa kwenye doria katika mitaa ya kata ya Kindai, walipata taarifa za kiintelijensia kuwa mtuhumiwa yupo baa ya Leaders maeneo ya Kibaoni.

“Baada ya polisi hao kupata taarifa hizo,walifika haraka kwenye baa hiyo na kujaribu kumkamata mtuhumiwa.Lakini alipambana nao huku akitaka kumnyang’anya silaha mmoja wa askari polisi hao,hata hivyo,hakuweza kufanikiwa”,alisema Haule.

Kaimu kamanda huyo,alisema baada mtuhumiwa kushindwa kupora silaha,  alifanikiwa kukimbia akitaka kutoroka ndipo  askari mmoja alifyetua risasi mbili hewani, ili kumwongofya aweze kusimama.Hakuweza kusimama,kitendo kilichomlazimisha askari kumjeruhi mguu wa kulia.

Kuhusu tuhuma zinazomkabili mtuhumiwa, Haule alisema  amefunguliwa kesi SI/IR/4412/2015 ya kuvunja nyumba usiku na kumwimbia  raia wa kigeni kutoka China, shilingi 17,442,000.

“Mwaka jana pia alifunguliwa kesi no.SI/1R/4722/2015 ya kuvunja nyumba usiku na kuiba shilingi 200,000 mali ya raia wa kigeni kutoka Korea. Ana kesi nyingine no.SI/1R/4723/2015 ya kuvunja nyumba usiku na kuiba fedha na simu  vyote vikiwa na thamani shilingi 3,101,000.Makosa hayo yote yanaangukia chini ya kifungu cha sheria namba 294 (2) na 296 (a) vya kanuni ya adhabu”, alifafanua.

Alisema kwa sasa mtuhumiwa Iddy amelazwa wodi namba tatu katika hospitali ya mkoa mjini hapa chini ya ulinzi mkali, na hali yake inaendelea vizuri.

Haule alisema baada ya upelelezi zaidi kukamilika,mtuhumiwa atafikishwa mahakamani kujibu tuhuma inayomkabili.