BILAL AHIMIZA UMUHIMU WAUWEKEZAJI ELIMU

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Makamu wa Rais wa Jamhuri ya Muungano wa Tanzania, Dk. MohamMed Gharib Bilal.

 

Makamu wa Rais wa Jamhuri ya Muungano wa Tanzania, Dk. MohamMed Gharib Bilal, amewaasa wadau wa elimu kuwekeza bila kuchoka kwenye elimu kuanzia ngazi za sekondari ili kupata wanafunzi wazuri watakaojiunga vyuo vikuu.
Dk. Bilal aliyasema hayo alipokuwa akifungua mkutano wa kimataifa wa kupitia masuala ya taaluma na mitaala katika Chuo Kikuu cha Waislamu (MUM) kilichopo mjini hapa jana.
Mkutano huo unahudhuriwa na zaidi ya watu 400 kutoka nchi 13 duniani.
Dk. Bilal aliwaasa waumini wa dini ya Kiislamu kufuata misingi ya dini hiyo kama inavyoelekeza hususan kwa wanafunzi wa elimu juu ambao wana jukumu la kuhakikisha wanasoma kutokana na kile ambacho Mwenyezi Mungu amekieleza katika kitabu chake kitukufu cha Qur`an.
Alisema tatizo lingine ambalo linasababishwa na ufaulu mdogo wa wanafunzi ni vyuo kupata wanafunzi wachache hasa wa masomo ya sayansi, akasema ni vyema vyuo vikashiriki katika kudaili wanafunzi kwa umakini na kuinua kiwango cha elimu.
Dk. Bilal pia alizilaumu baadhi ya taasisi za kidini zinazowashawishi wanafunzi wa kike na kiume kuacha kuchukua masomo ya sayansi na udaktari katika vyuo vikuu vya hapa nchini na hivyo kukosa wataalam wengi wa kutosha katika sekta hiyo.
Alisema wanafunzi wengi waliotoka sekondari wamekuwa na uelewa mdogo.
Aidha, alibainisha kuwa kushuka kwa elimu ya sekondari nchini kunasababisha kupatikana kwa wahitimu wa vyuo vikuu wenye ujuzi na uelewa wa hali ya chini.
Mkuu wa Chuo Kikuu cha Waislamu mkoani Mororogo, Mwantumu Malale, kwa upande wake alisema ni vyema vyuo vikuu nchini vikafundisha elimu ya jumla inayozingatia mazingira ya nchi bila kujali elimu ya maghabiri pekee na kuwataka wanafunzi wa Kiislamu kutumia elimu kwa manufaa yao na taifa kwa ujumla.
Mkutano huo unawashirikisha wahakiki wa kitaaluma na wadau wengine wa elimu kutoka nchi za Burundi, Rwanda, Kenya, Msumbiji, Malawi, Uganda, Afrika Kusini, Sudani Kusini, Malaysia, Saudi Arabia, Nigeria, Indonesia na wenyeji Tanzania.

CHANZO: NIPASHE

HATARI HII: Binti wa kazi ajeruhiwa vibaya kwa kumwagiwa uji wa moto na mke wa bosi wake, kisa wivu wa kimapenzi

Msichana Jackline Lasway akiwa amelazwa katika wodi ya kina mama namba mbili katika hospitali ya Mkoa wa Singida baada ya kujeruhiwa kwa kumwagiwa uji wa moto wakati akiwa dukani kwa bosi wake eneo la soko kuu Manispaa ya Singida.

Na Mwandishi Wetu , Singida.

Msichana mmoja mkazi wa eneo la Minga Manispaa ya Singida amenusurika kifo baada ya kumwagiwa uji wa moto na mke wa tajiri wake wa dukani  kutokana na kile kinachosadikiwa kuwa ni wivu wa kimapenzi.

Msichana huyo Jackline Lasway maarufu kwa jina la Pendo amelazwa wodi namba mbili katika hospitali ya Mkoa wa Singida, huku akiwa na majeraha ya moto  sehemu ya sikio la upande wa kulia na mgongoni.

Akizungumza kwa taabu katika wodi hiyo, Pendo alisema kuwa tukio hilo limetokea juzi mchana wakati akiwa dukani kwa bosi wake aliyemtaja kwa jina la Charles Kamnde “Frarucha”.

Alisema akiwa anaendelea na kazi yake ya kuuza bidhaa mbalimbali dukani hapo gafla alitokea mke wa bosi wake akiwa na chupa yenye uji wa moto na kumtaka kumwagia usoni.

Hili ni jeraha ambalo Jackline ameumia.

Alisema aligeuka ili uji ule usimwagikie usoni na ndipo ulimuunguza sikio la kulia na mgongoni ambapo baada ya mke wa bosi wake kumkosa uso alitoa kisu kutaka kumchoma kifuani.

“Mimi sikua na ugomvi nae wala sijui chanzo cha yeye kufika dukani na kufanya hili tukio, maana kama ni kazi mi nafanya kulingana na maelekezo kutoka kwa bosi wangu Chale.” Alisema.

Alisema katika kurupushani za kujiokoa asichomwe kisu hicho alifanikiwa kumkamata mkono mwanamke huo na kupiga kelele ambapo watu walifika na kumwokoa.

Hata hivyo alisema alichukuliwa na bosi wake hadi kituo cha polisi mjini Singida na kupewa PF 3 kwa ajili ya matibabu na kuletwa katika hospitali hiyo ambako amelazwa huku akiwa na majeraha makubwa mgongoni.

Waandishi wa habari wakimchukua maelezo msichana huyo.

Muuguzi wa zamu katika wodi namba mbili ya wanawake, Anna Sprian alisema hali ya mgonjwa huyo inaendelea vizuri, na anaendelea kupatiwa matibabu ya majeraha ya moto aliyopata.

Kwa upande wake mmiliki wa duka hilo Chale Kamnde ‘Frarucha’ alikiri kutokea kwa tukio hilo na kusema kuwa hayuko tayari kulizungumzia kwani maelezo aliyotoa binti huyo yanajitosheleza.

Baadhi wa kinamama waliohojiwa kuhusiana na tukio hilo wameonesha masikitiko yao kutokana na hatua ya mwanamke huyo kumwagia uji msichana huyo.

Msichana Jackline akilia wakati akiwaonesha waandishi wa habari jeraha alilomwagiwa uji na mke wa bosi wake.

Amina Ramadhani alisema hicho ni kitendo cha kinyama kwa binti mdogo kama huyo na kwamba kama aliona kuna mahusiano ya kimapenzi na mumewe angetumia busara na kumwondoa dukani na sio kumuunguza kwa uji wa moto.

Veronika Masawe alisema amesikitishwa na tukio hilo na kusema kuwa hakiendani na haki za binadamu kwa kuwa ni kumdhalilisha msichana huyo ambaye alikuwa akifanya kazi kwa ajili ya kujipatia kipato.

Kamanda wa polisi Mkoani Singida, Geofrey Kamwela amethibitisha kutokea kwa tukio hilo na kwamba wanamshikilia mtuhumiwa kwa mahojiano baada ya upelelezi kukamilika atafikishwa mahakamani.

Muuguzi wa zamu katika wodi namba mbili Anna Sprian akizelelezea maendeleo ya Jackline.

Hawa ni majirani waliofika kumjulia hali majeruhi Jackline katika hospitali ya mkoa wakihojiwa na waandishi wa habari.

Jack akiwa wodini kabla ya kuzungumza na vyombo vya habari.

Kibao cha hospitali ya mkoa wa Singida.

Kibao cha wodi namba mbili hospitali ya mkoa wa Singida.(PICHA ZOTE NA KAMERA YA MOblog SINGIDA).

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

MO awashtaki CCM Singida kwa Kinana

Katibu wa CCM Mkoa wa Singida Naomi Kapambala aaizungumza na waanndishi wa habari juu ya ufafanuzi wa maendeleo ya ujenzi wa uwanja huo.

Na Hillary Shoo, Singida

Mbunge wa Jimbo la Singida mjini (CCM), Mohammed Dewji ameulalamikia uongozi wa Chama chake Mkoa wa Singida kwa kitendo cha kuchelewesha mchakato wa kumalizia ujenzi wa Uwanja wa michezo Namfua ikiwa ni moja ya ahadi zake alizotoa kwa wananchi wakati wa Uchaguzi Mkuu mwaka 2010.

Kuchelewa huko kuanza kwa mchakato wa ukarabati na uwekaji wa nyasi za bandia kwenye uwanja huo imeelezwa ni kutokana na urasimu na maslahi binafsi miongozi mwa viongozi wa CCM Mkoa wa Singida.

Katika barua yake ya Julai 31 mwaka huu kwa Katibu Mkuu wa CCM, Abdulrahman Kinana, Dewji amedai kuwa kwa kiasi kikubwa ameweza kutekeleza Ilani ya Uchaguzi kwa vipindi vyote viwili pamoja na ahadi zake binafsi, isipokuwa ahadi ya kumalizia ujenzi wa michezo Namfua.

Katika barua hiyo, ambayo pia ameinakili kwa Rais Jakaya Kikwete, Katibu Baraza la wadhamini CCM Taifa, Katibu wa Uchumi na Fedha na Katibu wa CCM mkoa wa Singida, Dewji amedai kuwa kila alipotaka kufanya hivyo alipata vikwazo kutoka kwa viongozi wa CCM mkoa wa Singida.

Katikati ya kiwanja chenyewe.

Amesema kuwa matayarisho yote muhimu kuhusiana na ujenzi huo yapo tayari, ikiwa ni pamoja na kuwepo dola za kimarekani 880,000 (sawa na sh bilioni 1.46) ambazo kwa kushirikiana na Rais Kikwete aliweza kuzipata kutoka Makampuni ya Airtel Tanzania na Mohammed Ent (T) Ltd.

Dewji amesema wakati wa kampeni za uchaguzi mkuu wa mwaka 2010 yeye pamoja na Raisi Jakaya Kikwete walitoa ahadi ya kukarabati na kuweka nyasi za bandia

kwenye uwanja huo unaomilikiwa na chama cha mapinduzi CCM.

Hili ni jukwaa kuu la uwanja wa Namfua unaomilikiwa na CCM Mkoa wa Singida.

“Baada ya uchaguzi sote wawili tulishinda na sasa tunatumikia wananchi, na kwa kiasi kikubwa tumefanikiwa kutekeleza ilani ya uchaguzi kwa vipindi vyote viwili, pamoja na ahadi zetu binafsi, lakini ahadi tuliyotoa ya ukarabati wa uwanja mpaka sasa hatujafanikiwa kuitekeleza. Alisem MO na kuongeza

Dewji amesema anasikitishwa na uongozi wa CCM Mkoa wa Singida bila sababu za msingi wanachelewesha kuanza kwa mchakato wa ukarabati wa uwanja huo.

Aidha amesema kuna vikao vingi viimefanyika na makampuni hayo bila mafanikio na hivyo anaomba CCM Makao makuu kuingilia kati ili kama kuna jambo linasababisha kusuasua kwa mchakato huo liweze kupatiwa ifumbuzi na ukarabati ufanyike haraka iwezekanavyo.

Vijana wakicheza mpira uwanjani humo.

Amesema suala la uchakavu wa uwanja wa Namfua imekuwa ni kero kubwa inayowakabili wananchi wa jimbo la singida mjini kwa sasa na hivyo kuwanyima vijana fursa za kutumia uwanja huo ili kupata ajira na kukuza vipaji kwa vijana.

Kutokana na ukweli kwamba muda wa kuelekea Uchaguzi Mkuu 2015 unayoyoma, Dewji maarufu kwa jina la "MO" amemwomba Katibu Mkuu wa CCM kuingilia kati urasimu huo usio wa lazima ili ujenzi uweze kufanyika mapema.

Akizungumzia madai hayo ya Mbunge Dewji, Katibu wa CCM Mkoa wa Singida, Naomi Kapambala alikiri kupata nakala ya barua hiyo na kusema kuwa wamefanya matayarisho yote muhimu ikiwa ni pamoja na kufuatilia Airtel makao makuu juu ya suala hilo.

Aidha Kapambala amesema kuwa kamati ya siasa imemaliza kazi na kupeleka baraza la wadhamini, na kinachosubiriwa na baraza kukaa ili kutoka majibu.

“Mi namshangaa ni kwa nini yeye mwenyewe Dewji hajafika hapa ofisini na kupata ufafanuzi juu ya hili matokeo yake analeta nakala ya barua kwetu, akamwulize katibu Mkuu ambaye amemwandikia hii barua.” Alisema Kapambala

Hata wakati katibu mkuu alipokuja hapa tulimweleza juu ya hilo , yeye kama anaonaje ni vyema akafika ofisini ili kujua inachoendelea.

Sehemu ya jukwaa la uwanja wa Namfua linalotumiwa na washabiki likiwa linaonekana kuchakaa.

Aidha Kapambala amesema Katibu mkuu msaidizi yuko jijini Dar es Salaam ambapo pamoja na mambo mengine wamemwagiza kupitia baraza la wadhamini wa CCM ili kujua hatma ya suala hilo.

Pia Kapambala amesema pia ofisi yake imekwishatoa notisi kwa wafanyabiashara mbalimbali kuondoka kwenye eneo la uwanja ili kupisha ukarabati huo.

Mwenyekiti wa SIREFA Baltazari Kimario alisema anasikitishwa kuona maendeleo ya uwanja huo bado haujakamilika na hivyo kuathiri maendeleo ya soka katika mkoa wa singida.

Aidha wadau mbalimbali nao wametoa masikitiko yao kwa uongozi wa CCM Mkoa wa singida kuchelewesha mchakato huo kwa maslahi binafsi, huku Mbunge akiwa tayari kushughulikia kero hiyo.

Uwanja huo hivi sasa umebaki kuwa kama eneo maarufu la vijana kuvuta bangi na wengine kujisaidia hovyo kwenye vyoo na hivyo kutapakaa kwa vinyesi kila mahali ndani ya uwanja huo.

Ujenzi wa Uwanja wa Namfua,ambao ulikuwa ukienda sambamba na Jengo la CCM mkoa, ulisimama miaka ya 1990 na tangu wakati huo uwanja huo umebakia gofu na kugeuka maficho ya wahalifu mbalimbali na eneo la choo cha jumuiya.

Baadhi ya Waandishi wa habari wa Mkoa wa Singida wakipiga picha jengo la makao makuu ya CCM Mkoa wa Singida.

Vijana hawa walikutwa wakivuta bangi kwenye majukwaa ya uwanja wa Namfua.

Hapa ndio makao makuu ya CCM Mkoa wa Singida.(Picha zote na Hillary Shoo).

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

MAZISHI YA ANDREA DUMA BABA WA MWANDISHI WA HABARI WA MOblog SINGIDA

Jeneza lililobeba mwili wa mchungaji mstaafu wa kanisa la Free Pentekoste (FPCT) Ihanja wilaya ya Ikungi, Andrew Duma (92).

Katibu mkuu wa makanisa ya Free Pentekoste nchini,Elias Shija, akihubiri kwenye ibada ya mazishi ya mchungaji mstaafu wa Free Pentekoste Ihanja wilaya ya Ikungi mkoa wa Singida, Andrea Duma.

Mjumbe wa halmashauri kuu CCM (NEC) Singida mjini, Hassan Mazala, akitoa nasaha zake kwenye ibada ya mazishi ya mchungaji mstaafu wa kanisa la Free Pentekoste Ihanja wilaya ya Ikungi, Andrea Duma.Mazishi hayo yamefanyika jumamosi katika kijiji cha Ihanja.

Baadhi ya viongozi wa madhehebu ya dini mbalimbali waliohudhuria mazishi ya mchungaji mstaafu wa kanisa la Free Pentekoste Ihanja wilaya ya Ikungi mkoa wa Singida.Andrea Duma.Mazishi hayo yamefanyika katika kijiji cha Ihanja Jumamosi iliyopita.

Baadhi ya waombelezaji waliohudhuria mazishi ya mchungaji mstaafu kanisa la Free Pentekoste Ihanja Andrea Duma yaliyofanyika katika kijiji cha Ihanja.

Jeneza lillobeba mwili wa mchungaji mstaafu wa kanisa la Free Pentekoste (FPCT) Ihanja wilaya ya Ikungi mkoa wa Singida Andrea Duma (92), likiingizwa kaburini, kuhitimisha safari yake hapa duniani.Mazishi hayo yamefanyika Jumamosi iliyopita katika kijiji cha Ihanja.(Picha zote na Nathaniel Limu).

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

Wakulima Waneemeka na Elimu ya uzalishaji wa Mboga Mboga kutoka TAHA

Mh. Dr. Christine Ishengoma Mkuu wa Mkoa wa Iringa akipokea taarifa kuhusu mfumo wa taarifa za masoko kutoka TAHA unavyofanya kazi zake kutoka kwa Cyrila Antony Afisa wa Masoko

Mkuu wa mkoa wa Iringa  Mh. Dr. Christine Ishengoma akisikiliza maelezo kutoka kwa Mtaalamu wa kilimo wa TAHA Bw Ringo kuhusu uzalishaji wa zao la nyanya 

Elimu ikiendelea kutolewa

 Vitalu na green houses

 Aina Mbalimbali za matunda ambazo zimezalishwa na wakulima kutokana na elimu Bora waliyo ipata kutoka TAHA

 Mwananchi akipata maelezo kutoka kwa Mtaalamu wa TAHA

 Teknolojia ya umwagiliaji kwa mfumo wa kilimo cha matone ambao pia unaonesha utengenezaji bora wa matuta, nafasi na usafi

Hivi ni  Vitalu vya TAHA na Barton Tanzania

 Vitalu vya mboga na green house kama zinavyoonekana katika picha

 Watangazaji wa Radio Sweet FM ya Mbeya wakishangaa ubora wa karoti ambayo ni daraja la kwanza inapopelekwa sokoni

 Zao la chines

Zao la karoti lililopandwa kwenye vitalu vilivyopo ndani ya viwanja vya Nanenane Mbeya kwenye Banda la TAHA

 Mwananchi akifurahia maelezo kuhusu zao la karoti daraja la kwanza

********************

Wakulima na wananchi mkoani Mbeya wameendelea kuneemeka na elimu ya bure ya uzalishaji wa mazao ya mboga, viungo na matunda inayotolewa na Asasi ya wakulima, wafanyabiashara na watoa huduma ya mazao ya horticulture nchini Tanzania (TAHA).

Wakulima hao wameneemeka na elimu hiyo inayotolewa na maafisa wa ufundi wa kilimo kutoka TAHA kwa ushirikiano na wale wa Barton Tanzania ambao kwa pamoja wameweka kambi katika viwanja hivyo ili kuhakikisha jamii ya wakulima wa mboga kutoka ukanda wa Nyanda za Juu Kusini wanapata elimu ya msingi bora ya uzalishaji wa mboga wenye tija.

"Mpaka sasa tumetembelewa na wananchi na wakulima wasiopungua 460 ambao wamefika katika banda letu hapa Nanenane kwenye viwanja vya John Mwakangale wakitaka kujifunza mbinu na misingi ya awali ya uzalishaji wa mazao ya horticulture, hiyo ni ishara njema kwani inaonesha ni kiasi gani wananchi  wanatafuta mbinu fasaha inayoweza kuwakwamua kutoka katika uzalishaji wa mboga wa kawaida mpaka uzalishaji wa tija unaozingatia viwango vya kitaifa na kimataifa" Alisema Likati Thomas afisa Mawasiliano kutoka TAHA.

Akifafanua zaidi kuhusu elimu ya kilimo cha uzalishaji wa mboga kwenye banda la TAHA afisa mawasiliano huyo alisema kuwa wamepanda mazao tofauti katika ploti zilizopo kwenye eneo lao ambapo wakulima na wananchi wanaopata fursa ya kutembelea eneo hilo ujifunza teknolojia mbalimbali za uzalishaji kama vile uzalishaji unaozingatia Mbegu bora zenye tija.

Teknolojia nyingine ni pamoja na upandaji mazao unaozingatia nafasi kati ya miche na miche, umwagiliaji kwa njia ya matone(drip irrigation) unaozingatia uhifadhi wa maji na mazingira pamoja na ulimaji wa matuta yaliyoinuka ili kutoa nafasi kwa mizizi ya mimea kupenyeza kwenye udongo ili kujitafutia lishe.

Mbali na elimu hiyo ya uzalishaji wa mboga, wananchi wa Mbeya wanaotembelea banda hilo pia wanapata fursa ya kujifunza elimulishe kutoka kwa mtaalamu wa masuala ya lishe wa TAHA Bi. Lawrencia …..ambaye amekuwa akiwafundisha wananchi juu ya umuhimu wa ulaji wa mboga na faida zake kwa afya ya miili yetu.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

DK.KITILLA AFICHUA SIRI YA ZITTO KWENDA MAHAKAMANI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

MHADHIRI wa Chuo Kikuu cha Dar es Salaam, Dk. Kitilla Mkumbo, amefichua siri ya kwenda mahakamani kwa Mbunge wa Kigoma Kaskazini, Zitto Kabwe (CHADEMA), kwamba ni baada ya jopo la wasomi kumshauri kufanya hivyo.

Dk. Kitilla alisema kabla ya hapo, mbunge huyo alikuwa tayari kuwaachia viongozi wa chama chake wamvue uanachama kama alivyofanyiwa yeye na aliyekuwa Mwenyekiti wa CHADEMA Mkoa wa Arusha, Samson Mwigamba.

Alitoa kauli hiyo juzi wakati akiendesha mafunzo ya siku moja kwa viongozi wa mikoa na wajumbe wa Chama cha ACT–Tanzania juu ya historia, misingi, itikadi na falsafa ya chama hicho.

Alisema kwamba jopo la wasomi walimuelezea Zitto umuhimu wa kuangalia maslahi ya watu waliomchagua na njia inayotaka kutumika kufikia uamuzi wa kumvua uanachama wake katika chama hicho.

“Sisi tuliridhia kuvuliwa uanachama kwa kuwa hakukuwa na maslahi ya moja kwa moja yanayoweza kuathiri maisha yetu na familia zetu, lakini kwa Zitto hilo lingetokea na kumuathiri kwa mazingira yote mawili,” alisema.

Kuhusu kuandaa waraka unaodaiwa kuwa ni wa usaliti ndani ya CHADEMA, Dk. Kitilla alisema katika utatu wao wakiwa wanachama wa CHADEMA wakati huo walikuwa na nia ya mabadiliko ya muda mrefu ndani ya chama hicho baada ya kubaini baadhi ya mambo hayaendi sawa.

“Mimi, Mwigamba na Zitto tumekuwa na nia ya muda mrefu ya kuleta mabadiliko ndani ya CHADEMA, matamanio yetu ya mabadiliko yalihitimishwa kwa kuandika waraka wa mabadiliko, ukiainisha sababu za mabadiliko na mikakati yetu ya kushinda uchaguzi ndani ya chama,” alisema Dk. Kitilla.

Aliongeza baada ya Mwigamba kukutwa na waraka wa mabadiliko uliodhaniwa kuwa ni uhaini, walifukuzwa ndani ya chama hicho na kwamba hawakuona sababu ya kujiunga na chama kingine chochote cha siasa katika vyama vilivyopo.

Kwamba baada ya hali hiyo, vyama mbalimbali viliwafuata na kutaka wajiunge navyo, ikiwamo CCM, na waliwakatalia kwa kuamini kujiunga na chama hicho ni usaliti wa dhamira zao katika kufikia mabadiliko, na kuwa nchi ilipofika sio muda wa kukisaidia kuendelea kubaki madarakani.

Alisema matatizo yaliyopo katika vyama vya upinzani ni ya asili na yanafanana kwa kiasi kikubwa, ikiwa ni pamoja na kukosekana kwa umakini, kuwepo kwa hisia umiliki pamoja na kukosekana kwa demokrasia.

Dk. Kitilla ambaye kwa sasa ni mshauri wa ACT-Tanzania, alisema iwe ni marufuku kwa mwanachama wa chama hicho kuzungumzia vyama vingine badala ya kuwazungumzia wananchi na matatizo yao.

Chanzo:Tanzania Daima

MFUGAJI ATISHIA KUMBURUZA MAHAKAMANI DIWANI

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

MFUGAJI na mkulima wa Kijiji cha Ufana, Kata ya Mgungira, Tarafa ya Sepuka, wilayani hapa mkoani Singida, Sawaka Kujelwa, ametishia kuwafungulia mashtaka mahakamani viongozi wawili wa Chama Cha Mapinduzi (CCM), kata hiyo kwa madai ya kuuza zaidi ya ekari 500 anazozitegemea kwa ajili ya makazi, kilimo na malisho.

Kujelwa, aliwataja viongozi hao kuwa ni Mwenyekiti wa CCM wa Kata, Nhende Shija na Diwani Mussa Ng’imba, ambao alidai waliamua kuvamia maeneo yake baada ya yeye kuugua ugonjwa wa kushindwa kwenda haja ndogo, Desemba 21, 2009.

Alisema baada ya kuugua ndipo alilazimika kwenda kwenye matibabu ambako alipita hospitali ya misheni ya Mtakatifu Gasper mjini Itigi, Makiungu, Puma na hatimaye hospitali ya Rufaa ya KCMC Moshi, mkoani Kilimanjaro mwaka 2010 alikopona.

“Baada ya kupata matibabu KCMC, madaktari walinishauri kukaa karibu na hospitali hiyo kwa uchunguzi zaidi, ambapo nilikaa hadi mwaka 2012 ndipo niliporudi nyumbani, lakini nikilazimika kufuata masharti ya madaktari ya kutofanya kazi ngumu,” alisema.

Aliongeza kuwa wakati akiwa kwenye matibabu Moshi KCMC, ndipo diwani kwa kushirikiana na mwenyekiti wa chama wa kata, walipoanza kuyavamia maeneo yake aliyokuwa akiyategemea kwa kilimo na malisho ya mifugo, na mwaka jana wakati anaendelea na mapumziko ya matibabu, watu walizidi kuvamia.

Alisema kuwa baada ya kuona hali hiyo, aliandika barua kwa Kaimu Ofisa Mtendaji wa Kijiji hicho, kumjulisha, lakini bila mafanikio na ndipo mwaka jana alimwandikia mwenyekiti wa kijiji kumfahamisha juu ya uvamizi huo.

Mwenyekiti wa Kitongoji cha Matinje, Elius Milekwa na Mwenyekiti wa Kijiji cha Ufana, Machiya Nyorobi, walipotakiwa kuzungumzia malalamiko hayo, walikiri eneo lililovamiwa ni la Kujelwa na kwamba wanaoendesha shughuli za kilimo na malisho kwa sasa ni wavamizi na hawataki kuyaachia.

Mwenyekiti wa CCM Kata ya Mgungira, Nhende Shija alipoulizwa sababu za kuvamia maeneo hayo, alidai hakuvamia bali ni mali yake.

Diwani Ng’imba alisema kuwa, malalamiko hayo hayana ukweli wowote ila ni mali yake na mwenyekiti huyo, na kwamba Sawaka ni tapeli tu.

 Chanzo;Tanzania Daima

DALADALA NAMBA 'T111 BRN'

 

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

Nani atabisha kwamba hakuna jambo linalogusa Wabongo kama elimu? Au labda tuseme hakuna jambo linalogusa Wabongo kama matokeo ya mitihani. Ndiyo maana sikushangaa kupokea mapepe kibao wiki hii. Hebu niwaonyeshe mbili tu.

Yes, Serikali yetu bunifu. Kwa nini tuhangaike kuinua uwezo wakati tunaweza kushusha viwango? Achana na hawa wanaharakati wote, ambao kazi yao ni kupinga tu utadhani wanaamka na kula malimau tu kila asubuhi. Mimi nasema, hongera sana wote waliofaulu mwaka huu. Hongera kwa kuzaliwa mwaka mwafaka, mwaka wa neema, mwaka wa mafanikio. Hongera zaidi kwa wizara yetu ya shule pamoja na Baraza la Vyakihuni kwa kuonyesha njia. Kwa njia hii tunajua Bongo yetu itasonga mbele kwa kasi sana.

Kwanza kwenye mpira. Miaka mingapi tumelalamika kuhusu kiwango cha mpira hapa petu? Uongozi mbovu huzaa mpira mbovu. Na kutokana na ubovu huo, tumepata matatizo sana ya uhaba wa magoli mara kwa mara. Tunajitahidi kuwafundisha washambuliaji wetu jinsi ya kufunga, lakini ukweli ni kwamba magoli ni madogo mno. Hivyo, kuanzia msimu ujao wa ligi kuu na ligi zote chini yake, magoli yatapanuliwa kwa mita tano zaidi. Nadhani kwa njia hiyo tutaweza kushangilia magoli mengi, potelea mbali iwapo kwenye mashindano ya kimataifa goli itakuwa dogo, lazima wajue kwamba mabadiliko ni sisi, sisi ni wabongo na tutabonga na kuboronga kwa njia zetu wenyewe.

Haya, upande wa fedha pia. Hawa watu wa Hazina watumie ubunifu badala ya ubanifu. Kama pesa hazitoshi, chapa pesa nyingi zaidi. Kwa njia hiyo, kila mtu atajisikia akibeba marundo ya manoti. Hata kama haina thamani ni lazima tushindane na wenzetu wa Zimbabwe, ambao hatimaye walitumia dola zao milioni moja kwa ajili ya kununua kilo moja ya sukari. Kila mtu milionea au hata bilionea, wataka nini zaidi?

Kwa kweli katika sayansi inaitwa sheria ya utapiamlo ni sheria ya Mungu kabisa. Mlo ukipungua kwa mtoto, tumbo linaongezeka, linatuna, linang’aa. Na elimu inaweza kuwa vivyo hivyo.

Tena ingawa tunafanya kwa mtindo wetu mwenyewe, tunaendeleza vizuri sana umoja wa Afrika. Wale wenye sifa ya uaminifu na kutokomeza utapeli walionyesha njia siku nyingi, yaani Nigeria lakini wapumbavu wa vyuo vikuu mwisho walikataa kuamini matokeo hayo, hivyo waliotaka kuingia vyuo vikuu vyao walilazimika kufanya mtihani wa ziada. Kufuru kabisa na ole wake profesa atakayejaribu huo upuuzi hapa. Kama mtu amepata cheti, wao ni nani kukihoji?

Baraza la Vihuni juuuuuu! Viwango ziiiiii, kidumu na kudumu.

Duh! Barua hii ilinishtua kidogo, lakini kabla sijaweza kuachana na mshangao wangu, ikaja nyingine.

We Makengeza,

Mimi sijui nifurahie ya mwaka huu au niomboleze ya mwaka jana. Yaani, baada ya kuletwa hapa kwenye shule ya walimu wawili na kitabu kimoja, nimejitahidi kwa nguvu zangu zote kuwapatia vijana wetu angalau misingi michache ya elimu, lakini haiwezekani. Wanapata kitu labda, lakini mbele ya mitihani lazima wafeli kwa sababu hatuna uwezo wa kuwapatia zaidi. Sasa mwaka huu, tupo walimu walewale na kitabu kilekile na hata notisi zilezile, maana utapata wapi zingine lakini ghafla shule nzima imefaulu. Haiyumkiniki. Sijaongeza juhudi wala maarifa, maana tangu niombe ualimu nimejitahidi vilevile. Na sioni kwamba wanafunzi wangu wamebadilika pia. Tena wa mwaka huu walikuwa na hasira zaidi wakijua watapigwa muhuri wa ujinga tu. Je, wanastahili kusonga mbele? Labda kwa kuwa na akili, ambayo ikikutana na mazingira ya kweli ya elimu, lakini kwa hayo waliyoyapata kutoka kwangu na mwenzangu, mmmmh! Tunaelekea wapi?

Basi kutokana na hayo, nikajikuta natafakari kwa kina wakati nimefunikwa na giza nene ya eneo letu. Wakati asilimia sitini ya shule za Kenya zina umeme, kwetu ni asilimia mbili tu ya shule za vijijini. Ndiyo maana elimu iko hoi kwa koroboi. Lakini angalau tuna nafasi ya kutafakari.

Sasa, uzee wako lazima unakumbuka enzi zile za kupiga deki resepsheni. Sijui inaitwaje siku hizi, lakini nimegundua kwamba tabia za mtu mmoja mmoja zinaakisi tabia za wakubwa wetu na mifumo yao ya kutufuma bila sisi kuwafumania. Angalia watoto wanavyohaha barabarani kutafuta wafadhili kwa ajili ya timu yao ya mpira au mahafali wa darasa la saba. Nani kawafundisha kwamba dunia ni kuombaomba siyo kufanya kazi? Elimu ya Kujitegemea siyo kujiegemea iliishia wapi? Hata ule mpango wa maskauti wa kufanya kazi ndogondogo ili walipwe kwa ajili ya mipango yao iliishia wapi? Nani kawatonya umatonya?

Haya, hata katika elimu mambo hayo ya kuwangia viwango yalianza leo? Tangu zamani sote tumethamini sura ya elimu, badala ya elimu yenyewe. Zamani ilitosha kunawa vizuri kwa uso wa kawaida, yaani kusoma kwa bidii chini ya uangalizi wa walimu wanaofundisha kwa bidii ndani ya mazingira wezeshi. Nakumbuka, maana hata mimi nilisoma wakati ule. Lakini hata wakati ule, bado wanafunzi wengi walijali sura ya elimu tu, siyo elimu yenyewe maana lengo lilikuwa cheti siyo zaidi ya hapo.

Haya, sura ya elimu ikaanza kuota vipele kutokana na sababu mbalimbali. Maarifa ikapungua na wengi walikosa vyeti ndipo ilibidi kutafuta sabuni za kuua vijidudu vilivyoanza kujitokeza. Badala ya kuoga vizuri, watu walitegemea sabuni itafanya kazi peke yake. Sabuni hii kwa lugha ya kitaalamu iliitwa sabuni twisheni. Na wengine walibuni sabuni kali zaidi iliyoitwa sabuni akademiki. Ndiyo maana tulisikia kwamba watu wengine walipata fasticlasi ya vidato, kisha wakala disko baada ya mwaka mmoja chuoni kutokana na kukosa sabuni hiyo (ingawa nasikia hata kule siku hizi sabuni hizi zimetapakaa).

Kutokana na sabuni hizo pia, Serikali yetu kufuru iliweza kubuni mpango wa viwango panuka, badala ya viwango pandisha. Kila mtu alitakiwa kuoga hata maji yakiwa machafu namna gani au hata kukosekana kabisa, ili mradi wanakubali kununua sabuni twisheni na wao. Wasipokuwa na uwezo wa kupata hiyo sabuni potelea mbali. Wenye sabuni ndiyo wenye zabuni za kujaza nafasi za juu.

Lakini mambo siyo rahisi kivile. Wasio na sabuni walianza kuwashwa sana, ngozi zao zikaharibika hadi wakaanza kudai elimu ya kweli na wao. Ndipo hapo tumekuja na mikorogo kabisa. Mtu anaweza kuwa hana maji, hana sabuni, hana chakula bora, lakini ili mradi resepsheni inapigwa deki. Nani atajua na ataweza kwenda kujinadi popote? Cheti ni mkorogo, ndiyo maana unaona watu wana sura ya Mirinda, lakini akili ya Pepsi.

Ndiyo maana nawahurumia wanafunzi wangu wa huko nyuma. Kama suala ni mkorogo tu, kwa nini pepa zao zisisahihishe upya ili na wao waingie katika ufalme wa mbingu.

Lakini mwisho, nawapa pole wanafunzi wa mwaka huu pia. Muwe mmebebwa na daladala ya ‘T111BRN’ au la, mustakabali wa nchi yetu uko mikononi mwenu.

Ndiyo. Siyo tu kwa sababu ambazo tumezizoea kwamba sura ya elimu itajenga sura ya ghorofa au daraja au kutibu sura ya magonjwa. Bali vizazi vitakavyofuata vitaweza kupata au kukosa nafasi kutokana na maisha yenu. Kwa matokeo kama haya, wengi mtaweza hata kuomba masomo ya nje. Iwapo nyinyi na Fasticlasi yenu (siyo First Class) mtaonekana katika vipimo vingine kwamba hamjui, mitihani ya Bongo itadharauliwa moja kwa moja. Na hata humu, nani atawaajiri mkorogo ukitambulika?

Mwalimu mkereketwa.

Na mimi pia nikabaki natafakari ndani ya giza nene. Twafunga goli au twajifunga? Kupanua goli ndiyo suluhisho. Tukichapa pesa nyingi, mwisho si itaonekana feki? Sura ya Mirinda itaficha daima akili ya Pepsi?
Chanzo:Mwananchi